ಸಿದ್ದುಲೋಕ

Tuesday, February 2, 2010

ವೀರ್ಯ ಪುರುಷರು
ಕೇಳು ಸಖೀ ಇವರ ಪೌರುಷದ ಕಥೆಯ
ಇನ್ನಾದರೂ ಅರಿ ಇವರ ವೀರ್‍ಯಾವೇಶದ
ವ್ಯಥೆಯ
ಸೀತೆಯನು ಕಾಡಿಗೆ ಅಟ್ಟಿ
ಅಗ್ನಿ ಕುಂಡದಿ ನೂಕಿ
ಶೂರ್ಪನಕಿ ಮೂಗ ಕೊಯ್ದವರ
ಆದರ್ಶಗಳಲಿ ನೂಕಿಹರು ನಮ್ಮನು.
ಸುಂದರಿಯರನು ಸೂಳೆಯಾಗಿಸಿ
ಹುಟ್ಟಿದ ಸಂತಾನಗಳ ಸೂಳೆಮಕ್ಕಳೆಂದು
ಜರಿಯುವ ಚಂಡಾಲರ ಮತಿಯ ಮಿತಿಯ.
ದುಂಬಿ ಹೂ ಮೇಲೆ ನಯವಾಗಿ
ಆವರಿಸಿ ಬೇಕಾದಷ್ಟು ಮಧು ಹೀರಿ
ಕಟ್ಟುವ ಜೇನ ಸವಿಯ ಬಲ್ಲರೆ ಇವರು.
ಈ ಖೂಳರು ಬೇಡವಾದರೂ
ತೀರದ ತೀಟೆಗೆ ಎಲ್ಲಂದರಲ್ಲಿ
ಹಿಸುಕಿ ಹೊಸಕಿ ನಯಗಾರಿಕೆ ನಿಯತ್ತಲಿ
ಹಲ್ಕಿರಿಯುವ ಹಲಾಲುಕೋರರು.
ನೀ ಬೇಕೆಂದು ಹಂಬಲಿಸುವಾಗ
ಜೊಲ್ಲು ಸೋರಿಸಿ ನಿತ್ರಾಣಾಗಿ, ಬಾಲ ಮುದುರಿ
ಹಾಸಿಗೆಯಲಿ ಕಂಗಾಲಾಗುವ
ಕ್ರಿಮಿಗಳು.
ಬೇಡವೆಂದು ನಿರಾಕರಿಸಿದರೆ
ನಿಮಿರಿದವರಂತೆ ನಟಿಸಿ ಹಾರಾಡಲು
ಯತ್ನಿಸುವ ಖೂಳ ಮೃಗಗಳಿಗೆ ಬೇಕು-ಬೇಡಗಳ
ಅರಿಯುವ ತುಡಿತವಿಹದೆಲ್ಲಿ ?
ಇವರಾಡಿದ್ದೇ ಆಟ ಮಾಡಿದ್ದೇ ಮಾಟ.
ಸಮರಕ್ಕೆ ನಿಮಿರಿನಂತ ವೀರ
ಪುರುಷೋತ್ತಮನ ಸದ್ದಡಗಿಸಲೆಂದೇ
ಸೆಡ್ಡು ಹೊಡೆದು ಪುಟಿದ ಚೆಂಡಾಗಿ
ಚಂಡಾಡಿದರೆ
ಎಲ್ಲಂದರಲಿ ಕಿತ್ತಿ ಬರುವ ಬೆವರು
ತಡೆದು....ತಡೆ......ತಡೆದು
ನಡುಗುವ ತೊಡೆಗಳ ತಡವರಿಕೆಗೆ
ಪಡುವ ಮರುಕ.
ನೀ ಮೆತ್ತಗಾದರೆ
ವೀರರು.
ನಿಮಿರಿ ನಿಂತರೆ
ಮುದುರಿದ ಬಾಲ ಕೆದರಿದ
ಕೂದಲ ಮರೆಯಲಿ ಮಾಯವಾಗುವ
ಉತ್ತಮ ಪುರುಷರ ಪುರುಷೋತ್ತಮರ
ವೀರ-ಶೂರತನವ ವೀರ್ಯ ಶೌರ್ಯವ
ಹೇಗೆ ಬಣ್ಣಿಸಲಿ ಸಖೀ.....!
Posted by siddu yapalaparavi at 9:23 AM 0 comments
Labels: ಹೊಸ ಕಾವ್ಯ